نن به پاکستان د شانګهای همکارۍ سازمان د غونډې کوربه وي.
پيګرد خبري آژانس/ کابل افغانستان
د ۱۴۰۳ کال تلې يا ميزان مياشتې ۲۴
راپور : احمد خالد امرخيل
د پاکستان بهرنیو چارو وزارت وایي، دغه هېواد به نن د زېږیزې میاشتې په ۱۵مه او ۱۶مه د شانګهای همکاریو سازمان د ۲۳مې سرمشریزې کوربه وي.
دغه وزارت په یوه خبرپاڼه کې ویلي، دغه سرمشریزه کې به د چین، روسیې، بیلاروس، قزاقستان، قرغیزستان، ازبکستان او تاجکستان لومړي وزیران، د ایران د ولسمشر لومړی مرستیال او د هند بهرنیو چارو وزیر ګډون وکړي.
خبرپاڼه کې راغلي چې دغه سرمشریزه کې به د ترکمنستان بهرنیو چارو وزیر د ځانګړي مېلمه او د منګولیا لومړی وزیر د ناظر ګډونوال په توګه ګډون وکړي.
د شانګهای همکاریو سازمان دغه سرمشریزه کې به د غړو هېوادونو ترمنځ د اقتصادي، سوداګریزو او کلتوري همکاریو په اړه هر اړخیز بحثونه وشي.