هېوادوال: د مخابراتي شبکو خدمتونه صفر ته راټيټ شوي.
پيګرد خبري آژانس/کابل افغانستان
راپور : احمد خالد امرخيل
شنبه ليندۍ ۲۶مه ۱۴۰۱ کال
د پلازمېنې کابل په ګډون د هېواد په ټولو ولایتونو کې د مخابراتي شبکو د ستنو او کارکوونکو پر وړاندې ټول امنیتي ګواښونه له منځه تللي، خو لا هم هېوادوال په هېواد کې د مخابراتي شبکو د خدمتونو له ټيټ کیفیت او لوړ لګښت څخه څخه شکایت کوي.
د دوی په وینا،اوس مهال دغه خدمتونه صفر ته راټيټ شوي او د مخابراتي خدمتونو ټيټ کیفیت د اړیکو بهیر پرېکېدل، دوی له ګڼو ستونزو سره لاس او ګرېوان کړې دي.
په همدې حال کې هېوادوال د اسلامي امارت د مخابراتو او ټکنالوژۍ له وزارت څخه غواړي چې د مخابراتي شبکو پر وړاندې دې ټولې ستونزې هر څه ژر هوارې کړي.
بلخوا د مخابراتو او معلوماتي ټکنالوژۍ وزارت ویاند عنایتالله الکوزی وايي، چې د مخابراتي شبکو له لوري د خدمتونو وړاندې کول د تېر په څېر روان دي او که کومه ستونزه پیدا کېږي، دغه وزارت به یې هواره کړي.
دا لومړی ځل نه دی چې هېوادوال د مخابراتي شبکو د خدمتونو له ټيټ کیفیت او لوړ لګښت څخه نیوکه کوي، بلکې له دې وړاندې هم په مخکیني حکومت کې ګڼ شمېر هېوادوالو په دې برخه کې نیوکې او شکایتونه درلودل.
