معاون یوناما برای گفت‌وگو درباره افغانستان با مقام‌های تاجیکستان و ازبیکستان به دوشنبه رفت!
خبرگزاری پیگرد: کابل افغانستان
نوشته شده توسط احمد جاوید نیازی
یکشنبه ۲۹عقرب۱۴۰۱
دفتر سازمان ملل در افغانستان(یوناما )گزارش داده است که مارکوس پوتزل، معاون این دفتر برای گفت‌وگو با مقام‌های تاجیکستان و اوزبیکستان در مورد همکاری با افغانستان وارد دوشنبه، پایتخت تاجیکستان شده است.
به‌گفته‌ی یوناما، پوتزل پس از تاجیکستان به ازبیکستان نیز سفر خواهد کرد.
این دفتر امروز در صفحه‌ی فیس‌بوک خود نوشته است: «مارکس پوتزل، معاون یوناما در آغاز این هفته وارد دوشنبه شد تا با مقامات دولتی تاجیکستان و ازبیکستان در مورد گزینه‌های کمک به تقویت همکاری‌های منطقه‌ای با افغانستان و مردم آن دیدار و گفت‌وگو نماید.»
کشورهای آسیای میانه به‌جز تاجیکستان، روابط نزدیک با امارت اسلامی دارند.
این در حالی است که کشورهای آسیای میانه و روسیه تا کنون بارها است که نگرانی‌شان را از گسترش تروریسم از افغانستان به آن‌سوی مرزهای شمالی کشور ابراز کرده‌اند.
