دیدار مقامهای امارت اسلامی و هیأت تاجیکستانی در کابل پیرامون امنیت و مرزها
خبرگزاری پیگرد – افغانستان
نوشته شده توسط – مریم مددی
۲۶ عقرب : ۱۴۰۴
مقامهای بلندپایه امارت اسلامی افغانستان و جمهوری تاجیکستان در کابل دیدار و پیرامون مسائل امنیتی، مرزی و روابط دوجانبه گفتوگو کردند.
براساس اعلامیه وزارت سرحدات، اقوام و قبایل، نورالدین نوری، وزیر این وزارت، روز دوشنبه ۲۶ عقرب، میزبان هیأتی از جمهوری تاجیکستان به رهبری میرزازاده عبدالواحد در کابل بود.
در این دیدار، دو طرف روی موضوعاتی چون (تثبیت سرحد مشترک، تحکیم امنیت، گسترش روابط و حل مشکلات مرزی )بحث و تبادل نظر کردند.
آقای نوری در این نشست تأکید کرد که تثبیت دقیق سرحدات میان افغانستان و تاجیکستان میتواند بهگونه مؤثری در تأمین امنیت و ثبات دو کشور نقش داشته باشد.
در همین حال، میرزازاده عبدالواحد، نماینده هیأت تاجیکستان، نیز ابراز امیدواری کرده که اختلافات و مسائل مرزی از طریق گفتوگو و تفاهم مشترک حلوفصل شود. او همچنین از ادامه همکاریها در این زمینه استقبال کرد.
این نخستین سفر رسمی یک هیأت بلندپایه تاجیکستانی به افغانستان پس از رویکار آمدن دوباره امارت اسلامی در کشور است. تاجیکستان تاکنون از برقراری رابطه رسمی با حکومت جدید افغانستان خودداری کرده و سفارت افغانستان در دوشنبه نیز تحت کنترول دولت پیشین باقی مانده است.
